Taare zameen par - அம்மா பாட்டு

நான் சமீபத்தில் மிகவும் ரசித்த பாட்டு!
திரைஅரங்கில் இந்த பாட்டு ஓடும் போது என் கண்களில் கண்ணீர்.
இந்த படத்தின் விமர்சனத்தை நம்ம குசும்பன் அண்ணாச்சி கூட போட்டிருக்காரு.

தாயை பிரிந்திருக்கும் அனைவருக்கும் இந்த பாட்டை கேட்கும் போது தொண்டை அடைத்திருக்கும் என்பது எனது யூகம்.
பாடலின் மெட்டு,சங்கர் மஹாதேவனின் குரல்,அசத்தலான வரிகள்,இவையனைத்தும் பாட்டில் மிக அருமை.

நீங்களும் தான் கேட்டு பாருங்களேன்!! :-)



யூட்யூப் பாக்க முடியாதவங்க எல்லாம் பாட்டை இங்கிட்டு போய் கேட்டுக்கோங்க!! :-)

படம் : தாரே சமீன் பர் (நட்சத்திரங்கள்,பூமியின் மேல் )
இசை:சங்கர் எஹ்சான் லாய்
பாடகர்: சங்கர் மஹாதேவன்

இந்தி பாடல் வரிகள்(மொழி பெயர்ப்புடன்)

Main Kabhi Batlata Nahin
Par Andhere Se Darta Hoon Main Maa
Yun To Main,Dikhlata Nahin
Teri Parwaah Karta Hoon Main Maa
Tujhe Sab Hain Pata, Hain Na Maa
Tujhe Sab Hain Pata,,Meri Maa
(நான் யாருகிட்டேயும் சொன்னது இல்லை
ஆனா எனக்கு இருட்டை கண்டால் ரொம்ப பயம் ,அம்மா.
நான் வெளியிலே எதுவும் காட்டிக்கறது இல்லை,
ஆனா உன் மேல எனக்கு நிறைய அன்பு அக்கறை இருக்கு அம்மா.
உனக்கு எல்லாமே தெரியும்தானே அம்மா??
உனக்கு இது எல்லாம் தெரியும்தானே, என் அம்மா)

Bheed Mein Yun Na Chodo Mujhe
Ghar Laut Ke Bhi Aa Naa Paoon Maa
Bhej Na Itna Door Mujkko Tu
Yaad Bhi Tujhko Aa Naa Paoon Maa
Kya Itna Bura Hoon Main Maa
Kya Itna Bura Meri Maa
(கூட்டத்துல என்னை தனியா விட்டு போய்டாதமா
என்னால விட்டுக்கு திரும்பி வர கூட முடியாது
இவ்ளோ தூரம் என்னை தள்ளி அனுப்பாத அம்மா
அப்புறம் உனக்கு என்னை மறந்தே போயிட போகுது
நான் என்ன அவ்வளவு கெட்டவனா அம்மா??
நான் என்ன அவ்வளவு கெட்டவனா,என் அம்மா)

Jab Bhi Kabhi Papa Mujhe
Jo Zor Se Jhoola Jhulate Hain Maa
Meri Nazar Dhoondhe Tujhe
Sochu Yahi Tu Aa Ke Thaamegi Maa
(எப்போவெல்லாம் ஊஞ்சலிலே
அப்பா என்னை பலமா தள்ளி விடுவாரோ
அப்போவெல்லாம் என் கண்ணு உன்னையே தேடும்
நீ வந்து என்னை தாங்கி பிடிச்சுப்பேன்னு)

Unse Main Yeh Kehta Nahin
Par Main Seham Jaata Hoon Maa
Chehre Pe Aana Deta Nahin
Dil Hi Dil Mein Ghabraata Hoon Maa
Tujhe Sab Hai Pata Hai Naa Maa
Tujhe Sab Hai Pata Meri Maa
(அவரு கிட்ட நான் அதை சொல்ல மாட்டேன்
ஆனா உள்ளுக்குள்ள நடுங்கிடுவேன்
முகத்துல அது காட்டிக்க மாட்டேன்
ஆனா மனசளவுல ரொம்ப பயந்துருவேன் அம்மா)

Main Kabhi Batlata Nahin
Par Andhere Se Darta Hoon Main Maa
Yun To Main,Dikhlata Nahin
Teri Parwaah Karta Hoon Main Maa
Tujhe Sab Hain Pata, Hain Na Maa
Tujhe Sab Hain Pata,,Meri Maa
(நான் யாருகிட்டேயும் சொன்னது இல்லை
ஆனா எனக்கு இருட்டை கண்டால் ரொம்ப பயம் ,அம்மா.
நான் வெளியிலே எதுவும் காட்டிக்கறது இல்லை,
ஆனா உன் மேல எனக்கு நிறைய அன்பு அக்கறை இருக்கு அம்மா.
உனக்கு எல்லாமே தெரியும்தானே அம்மா??
உனக்கு இது எல்லாம் தெரியும்தானே, என் அம்மா)

பி.கு: எனக்கு தெரிஞ்ச வரைக்கும் தமிழ் மொழிபெயர்ப்பு செஞ்சிருக்கேன்,ஆங்கில மொழிபெயர்ப்பு வேணும்னா இங்கிட்டு போய் பாருங்க!

பனி சூழ்ந்த ஆன் ஆர்பர்

கொஞ்ச நாளைக்கு முன்னாடி எங்க ஊருல கன்னா பின்னான்னு பனி கொட்டிச்சுன்னு பதிவு ஒன்னு போட்டிருந்தேன்.
அன்னிக்கு பெய்த பனியில ஊரு முழுக்க ஒரே வெள்ளையும் சொள்ளையுமா இருக்குது மக்களே!!
போன வருஷம் கூட ஒரே நாள்ல இவ்வளவு பனி பெய்யாததால ஊரு முழுக்க இப்படி குழுமியிருக்கும் பனியை பாத்துட்டு என்னால சும்மா இருக்க முடியல!!
அதான் செல்போன்ல கொஞ்சம் சுட்டேன். நான் தான் ரொட்டிய தவிர எத சுட்டாலும் உங்க கிட்ட காட்டியே பழக்கப்பட்டுட்டேனே ,அதான் முழுக்க முழுக்க பனி படர்ந்த பிரதேசத்தை பார்க்க புதிதாக இருக்கும் என்று எடுத்தவையெல்லாம் உங்கள் பார்வைக்கு!!பனி பெய்து இரண்டு நாட்கள் ஆன அப்புறம் கூட எப்படி தரையே தெரியாம கம்பளி மாதிரி பனி போர்த்திகிட்டு இருக்குது பாருங்க!! :-)
ரோட்டுல இருக்கற பனி எல்லாம் இங்கிட்டு அரசாங்கம் ஒழுங்க ஒதுக்கி வெச்சிருவாங்க!
இதுல ஆங்கிள் சரியில்ல,அதுல லைட்டிங் சரியில்ல,நீயெல்லாம் PIT-ல என்ன பண்ணுறன்னூ எல்லாம் கலாய்க்க கூடாது. செல்போன்ல கையில் கடைச்சது எல்லாம் சும்மா எடுத்தேன்!! சரியா?? :-)

ந.கு(நடு குறிப்பு! ஹி ஹி) : படங்கள் மேலே க்ளிக்கி பெருசாக்கி பாத்துக்கோங்கப்பு!!













தொலைந்து போன நட்பு

ராஜேஷை முதன் முதலாக ஒரு புகைப்படத்தளத்தில் தான் பார்த்தேன்.படங்கள் எல்லாம் சும்மா கண்ணில் ஒற்றிக்கொள்வது போல எடுத்து வைத்திருந்தான்.அப்பொழுது அவனை பாராட்டி மறுமொழி அளிக்கப்போய் தான் அவன் தமிழில் பதிவெழுதுபவன் என்று தெரிந்துக்கொண்டேன்.அவனின் தமிழ்ப்பதிவை சென்று பார்த்தால் கட்டுரைகள் ஒவ்வொன்றும் சுவையாகவும் சுவாரஸ்யமாகவும் இருந்தது.அவன் மேல் எனக்கு இருந்த மதிப்பு சில நாட்களிலேயே கிடு கிடு என்று உயர்ந்துக்கொண்டு சென்றது.இப்படியாக பின்னூட்டத்திலேயே கதைத்து விட்டு சில நாட்களில் மின் அஞ்சல் முகவரிகள் பறிமாறிக்கொண்டோம்.இவனை பார்த்து நானும் ஒரு பதிவு ஆரம்பித்து வைத்தேன்.எந்தன் ஆரம்ப கால முயற்சிகளில் உறுதுணையாக இருந்து என் பதிவுகளை படித்து அதில் முன்னேற்ற வழிகளையும் ஆலோசனைகளயும் அவன் தந்தான்.

சில நாட்கள் கழித்து அவனை உரையாடியில் தொடர்பு கொண்டேன்.பல திறமைகள் கொண்டவனாக இருந்தாலும் மிகவும் பணிவாக பேசினான். உரையாடுவதற்கும் ஒரு இனிய நண்பனாக அவன் தென்பட்டான்.இணைய உலகில் வலம் வர ஆரம்பித்த சில நாட்களிலேயே எனக்கு கிடைத்த இந்த நல்ல நண்பனை எண்ணி நான் பூரித்து போனேன்.இப்படி எங்கள் நட்பு வளர்ந்துக்கொண்டிருந்த நேரத்தில் தான் அவன் காணாமல் போனான்.

அவனின் பதிவுகளில் புதிய இடுகைகள் எதுவும் இடப்படவில்லை,அவன் புகைப்படத்தளத்திலும் புதிய படங்கள் இல்லை.உரையாடியிலும் அவனை பார்க்கமுடியவில்லை,மின் அஞ்சல் அனுப்பினாலும் பதில் ஏதும் இல்லை.எனக்கு அவனுக்கும் தெரிந்த பொதுவான இணைய நண்பர்களிடம் விசாரித்துப்பார்த்தேன்.அவர்களுக்கும் என்னை போல அவன் எங்கு சென்றான் என்றே தெரியவில்லை. அவனின் தொலைப்பேசி எண் கூட என்னிடத்தில் இல்லை,வீட்டு முகவரியும் என்னிடம் கிடையாது.சிறிது நாட்கள் குழம்பினேன்,திரும்ப வருகிறானா என்று அவன் பதிவுப்பக்கத்திற்கு அவ்வப்போது சென்று பார்த்தேன்,பின் சில நாட்களில் மறந்து போனேன்.

அதற்கு பின் மாதங்கள் சிறகை விரித்து கொண்டு பறந்து சென்றது.எத்தனை நட்புகள் பாராட்டுகள்.இணையத்தில் பல பேரை பழக்கப்படுத்திக்கொண்டேன்.பலர் வந்தார்கள்,என் பதிவை பார்த்தார்கள் சென்றார்கள்.என் பதிவு பல விதங்களாக அங்கீகாரங்களை வாங்கிக்குவித்தது.இதற்கு எல்லாம் முழுமுதற்காரணம் ராஜேஷ் தானே என்று நான் எண்ணாத நாள் இல்லை.முடிந்தவரை ஏதாவது மூத்த பதிவர்களிடம் பேச நேர்ந்தால் ராஜேஷை பற்றி விசாரிப்பது எனக்கு பழக்கமாகிவிட்டது.ஆனால் யாருக்குமே அவன் எங்கு சென்றான் ,அவனுக்கு என்ன ஆயிற்று என்று தெரியவில்லை.

இப்படியாக ஒரு ஒன்பது மாதங்கள் ஓடி விட்டிருந்த நிலையில் உரையாடியில் திடீரென அவன் உட்புகுந்தான்!!! எனக்கு ஆச்சரியம் தாங்க முடியவில்லை.சிறிது நேரம் ஆனந்தத்தில் கை கால் எதுவும் ஓட வில்லை. அவன் வேலை நிமித்தம் லண்டனில்் இருந்ததாகவும் ,இந்த நேரத்தில் அவனின தாயாருக்கு பெரும் பிணி தொற்றிக்கொண்டது என்றும்,இதற்காக அவன் இந்தியா திரும்பி சென்றதாக தெரிவித்தான்.அம்மாவின் உடல் நிலை நிமித்தமாக மருத்துவமனைக்கு அலைதலிலும்,தந்தை இல்லாத காரணத்தால் கல்லுரி செல்லும் தனது தங்கையை பார்த்துக்கொள்வதிலுமே நேரம் சென்று விட்டதாகவும்.பதிவுக்காக பிரத்தியேகமாக இந்த மின் அஞ்சல் கணக்கை ஏற்படுத்தியிருந்ததால்,இந்த ஒன்பது மாதங்களாக இதை திறக்கவேயில்லை என்றும் கூறினான்.சில மாதங்களுக்கு முன்பு அம்மாவின் உடல்நிலையில் நல்ல முன்னேற்றம் தெரிந்ததால்்,தங்கையின் படிப்பும் முடிந்து திருமணமும் சிறப்பாக நடந்தேறியதாம்,அதனால் இப்பொழுது அம்மாவை கூட்டிக்கொண்டு திரும்ப லண்டன்் வந்துவிட்டதாக தெரிவித்தான்!!! "ரொம்ப சந்தோஷம்!! அப்பொழுது முன்பைப்போல பதிவுகள் போட்டு பட்டையை கிளப்புவீர்களா??" என்று கேட்டதற்கு "நிச்சயமாக"என்றான் சிரிப்பான்களோடு.

இவனின் திரும்பலுக்கு பின் அதே தரத்தோடும் வேகத்தோடும்,பதிவுலகில் எழுதித்தள்ளிக்கொண்டிருந்தான்.இவனின் வருகையால் எங்கள் பதிவர் வட்டத்தில் உள்ள எல்லோருக்கும் ரொம்ப சந்தோஷம்.திரும்பவும் இவனால் எங்களின் எழுத்து வாழ்க்கை களை கட்டியது.முன்பை விட அவனிடம் நான் சிறிது அதிகமாகவே நட்பு பாராட்டினேன். இழந்து பின் சேர்ந்த நண்பன் என்பதால் இவனின் இருப்பை முழுக்க முழுக்க பயன்படுத்திக்கொள்ள நினைத்தேன்.அவன் என்னிடம் அவ்வளவாக தன்னை பற்றி சொல்லாவிட்டாலும் நான் என் வாழ்க்கையின் அனைத்து விஷயங்களையும் அவனிடம் பகிர்ந்துக்கொண்டேன்!! எங்களின் நட்பு நாளுக்கு நாள் நெருக்கமாகிக்கொண்டே போனது.இந்த நெருக்கத்தின் காரணமாக வெகு நாட்களாக நான் காதலித்து வரும் காதலியை பற்றியும் சொன்னேன்!! இது வரை நான் என் பெற்றொரிடம் கூட சொல்லாமல் வைத்திருந்தேன்.இவன் இந்த விஷயத்தில் அக்கறை எடுத்து விசாரித்து வந்தான். பெண்ணை பற்றியும்,எங்கள் காதல் பற்றியும்,இதை நாங்கள் வெற்றியாக்க தீட்டியிருக்கும் திட்டங்கள் பற்றியும் நிறைய கேள்விகள் கேட்பான்.ஆனால் ஆரம்பத்திலிருந்ததை விட இவனின் பழகும் விதத்தில் சற்றே மாற்றம் வந்ததாக எனக்கு பட்டது.ஆனால் அது என்ன என்று என்னால் தெளிவாக கூற முடியவில்லை.இந்த நிலையில் தான் அவனின் மின் அஞ்சல் முகவரியி லிருந்து இந்த கடிதம் வந்தது.

"அன்புள்ள பிரகாஷ்,
நல்லா இருக்கியா?? உன்னை போல ஒரு நண்பன் கெடைச்சதுக்கு நான் ரொம்ப குடுத்து வெச்சிருக்கனும்,ராஜேஷும் தான்!!என்ன குழப்பறேன்னு பாக்கறியா??? ஒரு கதை சொல்றேன்,கேட்டுகறியா??.

உனக்கு ரொம்ப நாளா ஒரு காதலி இருக்கறது போல ராஜேஷுக்கும் சின்ன வயசுல இருந்து ஒரு காதலி உண்டு.அவனோட பக்கத்து வீட்டுல இருந்த பொண்ணு!! அவன் கூடவே பள்ளிக்கூடத்துக்கும் காலேஜுக்கும் போன பொண்ணு.அவன் அம்மா கூடவும் தங்கச்சி கூடவும் எப்பவும் பழகிட்டு இருந்த பொண்ணு.அவனின் மிக நெருங்கிய தோழி அவதான்.ரெண்டு பேருக்கு கல்யாணம் பண்ணி வெக்கனும்னு ரெண்டு பேர் வீட்ல கூட மனசுலையே பேசி வெச்சிகிட்டாங்கன்னா பாத்துக்கோயேன்.அவங்க ரெண்டு பேரு நடுவுல எந்த ரகசியமும் இருந்தது கிடையாது.ஒருத்தர் மனசுல என்ன இருக்குன்னு இன்னொருத்தருக்கு புரியும்.இப்படி அவங்க வளர்ந்தாங்க!! அப்புறம் அவனுக்கு லண்டனில் வேலை கிடைச்சுது!! வந்துட்டு அவன் இணையத்திலும் நிறைய எழுத்துப்பணிகளில் ஈடுபட்டான்.ஆனா அவனோட எடுத்துக்களுக்கு பின்னாடி இருந்தது எல்லாம் அந்த பொண்ணுதான்.ரெண்டு பேரும் கலந்தாலோசித்த அப்புறம் தான் அவன் பதிவே எழுத ஆரம்பிப்பான்.எழுதிட்டு அவ சரின்னு சொன்னாதான் பதிவுல பிரசுரிப்பான்.இப்படி அவனோட எழுத்து,எண்ணம்,நண்பர்கள்,வேலைகள் எல்லாம் அவளுக்கு அத்துப்படி!! உன்னை பற்றி கூட அவன் தன்னோட காதலி கிட்ட சொல்லியிருக்கான்.இந்த மாதிரி சமயத்துல தான் அவன் அம்மாவுக்கு மாரடைப்பு ஏற்பட்டதா அவனுக்கு செய்தி வந்தது.விழுந்தடிச்சுகிட்டு இந்தியாவுக்கு பயணப்பட்டான்.அவன் விமானத்துல போய் இறங்கி வீட்டுக்கு போகற வழியில ஒரு சாலை விபத்துல இறந்துட்டான்.

இந்த செய்தி கேட்டு அவனோட அம்மாவும் மருத்துவமனையிலேயே இறந்துட்டாங்க!! அவனோட தங்கை அவனோட காதலி வீட்டுல தான் அதுக்கு அப்புறம் தங்கினா.அவளோட படிப்பு முடிஞ்சதும் அவளை ஒரு நல்ல இடத்தில் கல்யாணம் செஞ்சு வெச்சாங்க!! ஆனா அவனோட காதலிக்கு தான் உலகமே புரியல!! அவளோட வாழ்க்கையாவே நெனைச்சிட்டு இருந்த அவளோட காதலன் இறந்து போய்ட்டான். கொஞ்ச மாசத்துக்கு அவளால,அவன் இறந்துட்டான்றதையே நம்ப முடியல!! இந்த பைத்தியக்கரத்தனத்துல எப்படி இவளை காப்பாத்தறதுன்னு அவளோட வீட்ல யோசிச்சிட்டு இருந்த போது அவளுக்கு லண்டன்ல வேலை பாக்கற சந்தர்ப்பம் கிடைச்சுது!! மனசுக்கு மாற்றமா இருக்கும்னு அவங்க வீட்டுலையும் அவளை அனுப்பி வெச்சாங்க.லண்டன் வந்தவ எதேச்சையா ராஜேஷோட மின் அஞ்சலில் உட்புகுந்தாள்,அப்போ ராஜேஷின் பதிவுலக நண்பர்கள் எல்லாம் அவளை பிடிச்சுக்கிட்டாங்க!! எல்லோருக்கும் இவ்வளவு பெரிய கதைய எப்படி சொல்லுறதுன்னு தெரியாம இவளும் நான் தான் ராஜேஷ்னு பொய் சொன்னா!! ஓரு மாற்றமா இருக்குமேன்னு ராஜேஷின் பதிவுகளில் எழுத ஆரம்பிச்சா!!

அவனுக்கும் அவளுக்கு ஒரே எண்ண ஓட்டம் இருந்ததால,அவளால யாருக்கும் சந்தேகம் வராத மாதிரி அவனைப்போலவே எழுத முடிஞ்சுது.அவனின் நண்பர்களிடத்திலும் அவள் அவ்வளவா ஒட்டுதல் இல்லாம இருந்ததால யாரு கிட்டேயும் அவ்வளவா பேச கூட மாட்டா,அதனாலா யாரும் சந்தேகப்படல.ஆனா உன்கிட்ட மட்டும் தான் அவ ஓரளவிற்கு நெருக்கமா பழகினா.நாளாக நாளாக உன் கூட அவளின் நட்பு அதிகமாகி ஒரு விதமான அதிகப்படியான அன்பு உருவாக ஆரம்பிச்சுது!!! அதை காதல்னு எல்லாம் சொல்லி நான் கொச்சைபடுத்த மாட்டேன்,ஆனா சாதாரணமான நட்பா என்னால அது வகைப்படுத்த முடியாது.இந்த சமயத்துல தான் உன்னோட காதல் பத்தி அவளுக்கு தெரிய வந்தது!! தனக்கு பிடித்த எல்லாவற்றையுமே கடவுள் தன்னிடமிருந்து பிரித்துக்கொண்டு போவதாலும்,தன்னால் உனக்கு பிரச்சினைகளும் குழப்பங்களும் தான் வரும் என்று தோண்றுவதாலும் உன்னிடம் இருந்து தொடர்பை நிறுத்திக்கொள்ள அவள் முடிவு செய்து விட்டாள்!! இது தான் இந்த கணக்கு வழியாக அவள் அனுப்பும் கடைசி கடிதம்.இதன் பின் இந்த கணக்கை அவள் அழித்துவிடுவாள்! இதனால் ராஜேஷின் பதிவும் அழிந்துப்போய் விடும்!!

அவளும் இதையெல்லாவற்றையும் மறந்து விட்டு ஒரு புது வாழ்க்கையை தொடங்குவாள்.இது குழப்பமில்லாமல் தெளிவாக சிந்தித்து எடுக்கப்பட்ட முடிவு தான்!! நீ எதற்கும் கவலைப்படாதே!! இறைவன் உனக்கு ஒரு அருமையான துணையையும்,அன்பான நண்பர்கள் பலரையும் உனக்கு அளித்திருக்கிறார்,எல்லாம் நல்ல படியாக நடக்கும்!! என் வாழ்த்துக்களும்,வேண்டுதல்களும் எப்பொழுதும் உனக்கு உண்டு!
இப்படிக்கு,
ராஜேஷாய் நடித்த ராஜேஷின் காதலி (பெயர் வேண்டாமே)

நான் திக்பிரம்மை பிடித்தவன் போல கணிணி திரையை வெறித்துப்பார்த்துக்கொண்டிருந்தேன்.

பி.கு:எனக்கு பொதுவா சிறுகதை எல்லாம் எழுத வராது மக்களே.ஏதாச்சும் எழுத ஆரம்பிச்சா வளவளன்னு இழுத்துக்கிட்டே போகும்!! இந்த கருவை நான் ரொம்ப நாளா யோசிச்சு வெச்சிருந்தேன்!!சமீபத்தில் நண்பர் ஒருவருடன் இணையத்தில் உரையாடிக்கொண்டிருந்த போது இதை சிறுகதையாக இதை எழுதிப்பாக்கலாம்னு தோன்றியதின் விளைவாக ஒரு சிறு முயற்சி!! முடிஞ்ச வரைக்கும் ஆங்கில கலப்பு இல்லாம வேற எழுதனும்னு முயற்சி பண்ணி இருக்கேன்!எப்படி இருக்குன்னு பாத்து சொல்லுங்க!! :-)

எங்கும் பனி மழை பொழிகிறது

இங்கிட்டு நேத்து மதியத்துல இருந்து அநியாயத்துக்கு பனி பொழிவு!! இன்னமும் பெய்துக்கொண்டிருக்கிறது!!

சில படங்கள் உங்கள் பார்வைக்கு!! :-)

















சின்ன வயசுல மழை பத்தி ஒரு தமிழ் ரைம்ஸ் படிச்சிருக்கேன்.அதுல ஒரு வரி வரும்.
"பார் முழுதும் வீட்டுலே,
பறவை கூட கூட்டிலே
தவளை மட்டுமே பாடுமே
தண்ணீரிலே ஆடுமே"
அப்படின்னு வரும்!! அதே மாதிரி இங்கிட்டு எல்லரும் க்வார்ட்டர் அடிச்ச்சிட்டு குப்புற படுத்திட்டு இருக்கும் போது,நான் பாட்டுக்கு லூசு மாதிரி இந்த பனிப்பொழிவுல வெளியிலே போய் படம் எடுத்துட்டு இருந்தேன்.

படம் எல்லாம் நல்லா இருக்கா?? :-)

இதழில் கதை எழுதும் நேரமிது

கானா பிரபா அண்ணாச்சியோட இந்த பதிவை பார்த்தில் இருந்து மனசு முழுக்க இந்த பாட்டுதான்!!
எனக்கு மிகவும் பிடித்தமான பாட்டு,அதிலும் பாடலின் வரிகள் எனக்கு மிகவும் பிடிக்கும்.அலமாரியில் இடமின்றி கச்சிதமாக அடுக்கிவைக்கப்பட்ட புத்தகங்களை போல் வார்த்தைகளை அழகாக மெட்டிற்குள் அடுக்கியிருக்கும் பாடலாசிரியரை என் மனம் பாராட்டாத நாளே கிடையாது!!
மிக மிக அழகான வரிகள் கொண்ட பாடல்!! கூடவே எஸ்.பி.பி யின் துல்லியமான உச்சரிப்போடு கூடிய இனிமையான குரல்,சின்னக்குயில் சித்ராவின் தேன்குரலோடு சேர்ந்து தெவிட்டாத விருந்து படைத்து விடும்!! :-)
நான் என் நண்பர்களிடம் பல முறை,தமிழ் திரையிசை என்பது அள்ள அள்ள குறையாத பொக்கிஷம் என்று சொல்லுவதுண்டு.அந்த பொக்கிஷ மலையில் கடைந்தெடுத்த முத்துச்சரம் இந்தப்பாடல் என்று தைரியமாக சொல்லலாம்.இனிக்கும் இசை விருந்தை ருசித்து மகிழுங்கள்!! :-)


Get Your Own Music Player at Music Plugin

வீடியோ பார்க்க முடிந்தவர்கள் இந்த பாட்டு படமாக்கிய விதத்தையும் கண்டு களிக்கலாமே!! :-)



படம் :உன்னால் முடியும் தம்பி
பாடல் :இதழில் கதை எழுதும்
குரல் :எஸ்.பி. பாலசுப்ரமணியம், சித்ரா
பாடல் வரிகள்:புலமைப்பித்தன்
இசை : இளையராஜா

(ஆண்)
இதழில் கதை எழுதும் நேரமிது (2)
இன்பங்கள் அழைக்குது ஆ....

பெண்
மனதில் சுகம் மலரும் மாலையிது
மான்விழி மயங்குது ஆ....
மனதில் சுகம் மலரும் மாலையிது

(ஆண்)
இளமை அழகை அள்ளி அணைப்பதற்கே (2)
இருகரம் துடிக்குது தனிமையும்
நெருங்கிட இனிமையும் பிறக்குது
இதழில் கதை எழுதும் நேரமிது

(இசை....)

(ஆண்)
காதல் கிளிகள் ரெண்டு ஜாடை பேசக் கண்டு
ஏதோதோ எண்ணம் என் நெஞ்சில் உதிக்கும்

பெண்
நானும் நீயும் சேர்ந்து ராகம் பாடும்போது
நீரோடை போல என் நெஞ்சம் இனிக்கும்

(ஆண்)
இனிய பருவமுள்ள இளங்குயிலே (2)
ஏன் இன்னும் தாமதம் மன்மத காவியம் என்னுடன் எழுது

பெண்
நானும் எழுதிட இளமையும் துடிக்குது
நாணம் அதை வந்து இடையினில் தடுக்குது

(ஆண்)
ஏங்கித் தவிக்கையில் நாணங்கள் எதற்கடி
ஏக்கம் தனிந்திட ஒருமுறை தழுவடி

பெண்
காலம் வரும்வரை பொறுத்திருந்தால்
கன்னி இவள் மலர்க்கரம் தழுவிடுமே

(ஆண்)
காலம் என்றைக்கு கனிந்திடுமோ
காளை மனம் அதுவரை பொறுத்திடுமோ

பெண்
மாலை மணமாலை இடும் வேளைதனில்
தேகம் இது விருந்துகள் படைத்திடும்

(ஆண்)
இதழில் கதை எழுதும் நேரமிது
இன்பங்கள் அழைக்குது ஆ....

பெண்
மனதில் சுகம் மலரும் மாலையிது

(இசை....)

(ஆண்)
தோகை போலே மின்னும் பூவை உந்தன் கூந்தல்
கார்மேகம் என்றே நான் சொல்வேன் கண்ணே

பெண்
பாவை எந்தன் கூந்தல் வாசம் யாவும் அந்த
மேகம்தனில் ஏது நீ சொல்வாய் கண்ணா

(ஆண்)
அழகைச் சுமந்து வரும் அழகரசி (2)
ஆனந்த பூமுகம் அந்தியில் வந்திடும் சுந்தர நிலவோ

பெண்
நாளும் நிலவது தேயுது மறையுது
நங்கை முகமென யாரதைச் சொன்னது

(ஆண்)
மங்கை உன் பதில் மனதினைக் கவருது
மாறன்; கணை வந்து மார்பினில் பாயுது

பெண்
காமன் கணைகளைத் தடுத்திடவே
காதல் மயில் துணை என வருகிறது

(ஆண்)
மையல் தந்திடும் வார்த்தைகளே
மோகம் எனும் நெருப்பினைப் பொழிகிறது

பெண்
மோகம் நெருப்பானதும் அதைத் தீர்க்கும்;
ஒரு ஜீவநதி அருகினில் இருக்குது
மனதில் சுகம் மலரும் மாலையிது
மான்விழி மயங்குது ஆ....

(ஆண்)
இதழில் கதை எழுதும் நேரமிது
இன்பங்கள் அழைக்குது ஆ....
இதழில் கதை எழுதும் நேரமிது


பி.கு:பாடலின் வரிகள் இந்த தளத்தில் இருந்து வெட்டி ஒட்டியது

முதல் பனி என்னை நனைத்ததே

முந்தா நாள் ராத்திரியில இருந்து நேத்து முழுக்க நம்ம ஊர்ல நல்ல பனி.இந்த வருட பனிக்காலத்தின் முதல் தீவிரமான பனிப்பொழிவு இது என்பதால் என் செல்போன் கேமராவில் சில படங்களை பத்திரமாக தேக்கி வைத்துக்கொண்டேன்!
அந்த படங்கள் உங்கள் பார்வைக்கு!!
வழக்கம் போல, செல்போன் படங்கள் என்பதால் பிக்சல் தரத்தை கண்ட்டுக்கொள்ள வேண்டாம்!! :-)

மு.கு: படங்களின் மீது க்ளிக்கி பெரியதாக்கி பார்த்துக்கொள்ளுங்கள்!! :-)

:-)
படங்கள் பாத்துட்டு என்ஜாய் பண்ணு அது இதுன்னு சொல்லி வயித்தெரிச்சலை கிளப்பாதீங்க!! குளிரு உயிரை எடுத்துடும்!! இனிமே மூனு நாலு மாசத்துக்கு House arrest தான்!! :-P

செல்போன் சித்திரங்கள் சில

வணக்கம் மக்களே,
ரொம்ப நாள் கழிச்சு செல்போன் படங்கள் சில உங்கள் பார்வைக்கு.
செல்போனில் எடுத்ததால் பிக்செல்(pixel) தரம் குறைந்திருக்கும்.அதுவும் இல்லாமல் நான் பிற்தயாரிப்பு(post production) செய்கிறேன் பேர்வழி என்று நோண்டியதில் மேலும் குறைந்து விட்டது.வழக்கம்போல் அட்ஜஸ்ட் செய்துக்கொள்ளுங்கள்! :-)மேலே இருக்கறது எங்க அபார்ட்மெண்ட் காம்ப்ளெக்ஸ் வாசலிலே இருக்கற பலகை. வெளி வாகனங்களை நிறுத்தினால் அலேக்கா தூக்கிட்டு போயிருவோம்,அதுக்கு காசும் வண்டியின் உரிமையாளர்கள் தான் தரணும் அப்படின்னு டீஜெண்டா சொல்லியிருக்காய்ங்க!


எங்க ஆபீஸு சாப்பிடும் கூடத்தில் (Atrium) சாப்பிட்டு விட்டு கதைக்கும் போது என்னுள் ஒளிந்திருக்கும் புகைப்பட கலைஞன் அங்கே இங்கே நோட்டம் விட ஆரம்பித்து விடுவான். அப்பொழுது தலையை மேல் நோக்கி திருப்புகையில் பக்கத்தில் இருக்கும் விளக்கும்,தலைக்கு மேல் இருக்கும் கண்ணாடி கூரையும் இப்படியாக தெரிந்தது!!! விட்டு வைக்க முடியுமா??? :-)


எங்க வீட்டு பக்கத்தில் இருக்கும் நூலகத்துக்கு நான் அடிக்கடி நடந்து சென்று வருவது வழக்கம். போகும் வழியில் உள்ள இந்த மேம்பாலத்தின் மேல் நின்றுக்கொண்டு கீழே போய் வரும் வாகனங்களை வேடிக்கை பார்ப்பது எனக்கு மிகவும் பிடித்தமான பொழுதுபோக்கு. இந்த படத்தில் நிழலாக நிற்பது நான் தான் என்பது சொல்லித்தான் தெரிய வேண்டுமா?? :-)

எங்க சாப்பாட்டு கூடத்தின் மேல் உள்ள கண்ணாடி கூரை!! நான் முன்பே குறிப்பிட்டது போல ,விட்டு வைக்க முடியாத அழகு!! அதான் சுட்டு விட்டேன்! :-)

ஒரு மாலை நேரத்தில் எங்கள் ஊர் விமான நிலையத்தின் (சும்மா பேருக்கு ஒன்னு இருக்குங்க!) பக்கத்தில் இருந்து மேகங்களின் விளையாட்டால் கவரப்பட்டு எடுத்தது!!

வரட்டா?? :-)

அமெரிக்காவில் இலையுதிர்காலம் - படங்கள்

இந்த ஊருல இலையுதிர்காலம் வந்தா ஃபால் சீசன் (Fall season) அப்படின்னு ஒரே அமர்க்களமா போயிடும். மரங்களில் தங்கம் பூசி வெச்சா மாதிரி தக தகன்னு இலைகள் எல்லாம் ஆரஞ்சு கலரா மாறிடும்.
இதற்கென்றே சில சிறப்பான இடங்களுக்கு மக்கள் விடுமுறை எடுத்து சுற்றுலா போய் கொண்டாடுவாங்க.

ஆனா,இந்த வருஷம் ஃபால் ஃப்ளாப்(flop) ஆகிப்போச்சுன்னு சொல்றாய்ங்க. இலையெல்லாம் நிறம் மாறுவதற்கு முன்பாகவே உதிர ஆரம்பித்ததாக சொல்கிறார்கள். இருந்தாலும் நேற்றைக்கு ஏதோ ஒரு மூடில் காலங்கார்த்தால கேமராவை எடுத்துக்கொண்டு கிளம்பிவிட்டேன். வெளில -2 டிகிரி தட்பவெட்பம்னு போட்டிருந்தாங்க.ஆனாலும் வெளியில் போனதுக்கு சில படங்களை சுட்டுக்கொண்டு வந்தேன்.
அதான் உங்களுக்கு கொஞ்சம் காட்டலாம்னு!! :-)














பி.கு:படங்களின் பெரிய அளவு கோப்பு எனது Flickr தளத்தில் கிடைக்கும்.அதற்கான இணைப்பு இந்த தளத்தின் சைடிபாரில் உள்ளது. :-)

பூமியின் குறிக்கோள் என்ன??

இந்த பிரபஞ்சம் நாம் கற்பனை செய்து கூட பார்க்க முடியாத அளவுக்கு மிக மிகப்பெரியது.
இதில் எண்ண முடியா அளவுக்கு நட்சத்திரங்களும்,கிரகங்களும்,அண்டங்களும் நிறம்பியுள்ளன!!

இவ்வளவு பெரிய பேரண்டத்தில் ஒரு மூலையில் மிக மிகச்சிறிய ஒரு நீலப்புள்ளி உண்டு.அதில் உலவும் சிறு உயிர்கள் தான் நாம். நம் வாழ்க்கை,இயற்கை,பிரபஞ்சம்,படைப்பு இப்படி பல்வேறு விஷயங்கள் பற்றி புரியாமல் வியந்திருக்கிறேன்.
அந்த வியப்பின் பரிமாணங்களே, வானுக்குள் விரியும் அதிசயங்கள் எனும் தொடர்.
இப்படிப்பட்ட என் யோசனைகளுக்கு தீனியாக,என் வியப்பின் தோழனாக நான் பார்க்கும் ,கேட்கும்,படிக்கும் சில விஷயங்கள் அமைவதுண்டு.
அப்படி நான் ரசித்த ஒரு நிகழ்படம் ஒன்றை உங்களுடன் பகிர்ந்துக்கொள்கிறேன்! :-)

Chicago - திரைப்பட விமர்சனம்

Singing in the rain படத்தை பார்த்ததில் இருந்து Musicals எனப்படும் படவகை மேல் ஒரு தனி மரியாதை மற்றும் ரசிப்பார்வம் ஏற்பட்டது.
அந்த படத்தை பற்றி நான் எழுதியிருந்த விமர்சனத்திலேயே American in Paris மற்றும் Chicago ஆகிய இரு படங்களை பற்றி நண்பர் கே.ஆர்.எஸ் குறிப்பிட்டிருந்தார்.American in Paris என்னை அவ்வளவு கவரவில்லை என்றாலும் ,இன்று பார்த்த Chicago திரைப்படம் என்னை இந்த பதிவு எழுத தூண்டிவிட்டது.

சிறந்த திரைப்படம் உட்பட ஆறு ஆஸ்கர் விருதுகளை அள்ளிச்சென்ற இந்த படத்தில் Richard Gere,Catherine Zeta Jones,Renee Zellweger அகியோர் முக்கியமான பாத்திரங்களில் நடித்திருக்கிறார்கள்.20-ஆம் நூற்றாண்டின் தொடக்கத்தில் அமெரிக்காவில் பரவிய ஜாஸ் கலாசாரத்தை பற்றியும் அதனால் மக்களிடையே இருந்த celelbrity craze பற்றியும் மிக அழகான விமர்சனமாக இந்த படம் நம் கண் முன்னே விரிகிறது.

Musicals எனப்படும் பாடல்களுக்கு முக்கியத்துவம் தரும் மேடை நாடங்களில,் நடிக்க வாய்ப்ப்பு தருகிறேன் என்று சொல்லிவிட்டு ஏமாற்றும் தன் கள்ளக்காதலனை துப்பாக்கியால் சுட்டுக்கொன்று விடுகிறார் கதாநாயகி ராக்ஸி ஹார்ட் (Roxie Hart-Renee Zellweger). ஜெயிலில் அடைபட்டிருக்கும் போது இருவேறு கொலைகள் செய்ததற்காக கைது செய்யப்பட்டு சிறைக்குள் இருக்கும் வெல்மா கெல்லி (Velma Kelly - Catherine Zeta Jones) எனும் புகழ்பெற்ற மேடைபாடகி/நடிகையை சந்திக்கிறார். ஜெயிலின் வார்டனின் துணையோடு சிகாகோ நகரின் புகழ்பெற்ற வக்கீலான பில்லி ஃப்லின் (Billy Flynn - Richard Gere) என்பவறை தன் வழக்கை நடத்த ஒப்பந்தம் செய்கிறார். மக்களின் நாடித்துடிப்பை அக்கு வேறு ஆணி வேறாக தெரிந்து வைத்திருக்கும் அந்த வக்கீல் மக்கள் ஆதரவை பெற ஊடகங்களின் உதவியோடு ஒரு புனித பிம்பத்தை ராக்சியை சுற்றி எழுப்புகிறார்.இதனால் வெல்மா கெல்லிக்கு இருக்கும் முக்கியத்துவம் குறைகிறது.
இந்த நிலையில் வேறு ஒரு கொலை வழக்கில் மக்களின் கவனம் திரும்புவதை கண்டு தான் கர்ப்பமாக இருப்பதாக ஒரு புது செய்தியை அவிழ்த்து விடுகிறார ராக்ஸி்.இதன் மூலம் ஊடகங்களின் கவனம் இவர் மேல் திரும்பிவிடுகிறது. இப்படி ஒன்றின் மேல் ஒன்றாய் பொய்யும் புரட்டும் சேர்ந்துக்கொண்டே போக ராக்சியால் விடுதலை ஆக முடிகிறதா??வெல்மாவால் தன் மேல் மக்களின் கவனத்தை திரும்பவைக்க முடிகிறதா?? மக்களின் நட்சத்திர மோகம் எந்த அளவுக்கு உண்மையையும் நியாயத்தையும் மழுங்கடிக்கக்கூடியது என்ற பல கேள்விகளை சிறப்பாக விவரிக்கிறது இந்த படம்.

எந்த ஒரு சிறப்பான படத்தை எடுத்துக்கொண்டாலும் அந்த படத்தின் திரைக்கதை சிறப்பாக இருக்கும் என்பதில் எந்த சந்தேகமும் இருக்க முடியாது. இந்த படத்தின் மிகப்பெரிய பலமும் இதன் திரைக்கதைதான். அதுவும் பாடல்களூம் கதையும் அழகாக பின்னிப்பிணைந்து செல்வது மிக ரசிக்கும்படியாக இருந்தது. அதுவும் ராக்ஸி தன் கணவரை பற்றி பாடுவதாக வரும் பாடல்(Funny Honey) வரும்பொழுது ,ராக்ஸி கைது செய்யப்படும் காட்சி படமாக காட்டியிருக்கும் விதம் என்னை பெரிதும் கவர்தது. ராக்சியின் சிறையில் உள்ள வேறும் சில கைதிகளும் அவர்கள் சிறைக்கு வந்த கதையையும் விளக்கும் பாடலின் (Cell Block Tango) ஆரம்பம் அதி அற்புதம்.இதேபோல் நன்றாக கற்பனை செய்யப்பட்டு சேர்க்கப்பட்டிருக்கும் பாடல்கள் தான் இந்த படத்தை நாம் சலிப்பு வராமல் பார்க்க உதவுகிறது. அதுவும் கதையின் திருப்பங்கள் மிக வேகமாகவோ,மிக மெதுவாகவோ இல்லாமல் சரியான வேகத்தில் செல்வதால் பாடல்களுடன் சேர்ந்த திரைக்கதை இந்த படத்திற்கு கச்சிதமாக பொருந்துகிறது.

படத்தில் நடிகர் நடிகைகளின்் ஆட்டம் ஜீன் கெல்லியின் படங்களை ஒப்பிடும்போது ஓன்றுமே இல்லை என சொல்லலாம். ஆனால் நடிப்பும் வசனங்களும் ,அவற்றை அவர்கள் சொல்லும் விதமும் மிக நேர்த்தியாக அமைந்திருக்கின்றன.
இந்த உலகமே ஒரு சர்க்கஸ் தான் எல்லாமே ஷோ பிசினஸ்,நீ எதற்கும் கவலை படாதே என்று பில்லி ராக்சியிடம் சொல்லும்போது நம் மனதிற்குள் ஆயிரம் கேள்விகளையும் எண்ணங்களையும் எழுப்பி விடுகிறார் இயக்குனர்்.
உன்னுடன் நான் வேலை செய்ய முடியாது ,ஏனென்றால் நான் உன்னை வெறுக்கிறேன் என்று ராக்சி சொல்கிறார்.நீ என்னை வெறுக்கலாம்,ஆனால் உலகத்தில் ஒரு தொழிலில் ஒன்றாக வேலை செய்ய தான் அது ஒரு பிரச்சினை யாக இருக்காது,அதுதான் ஷோ பிஸினஸ் என்று வெல்மா புன்னக்கைத்துக்கொண்டே சொல்வது நான் மிகவும் ரசித்த இன்னொரு காட்சி.ஷோ பிஸினசாகிப்போன இந்த உலகில் அன்பும் கோபமும் தேவைக்கேற்ப தான் அமைகிறது என்று நம்மை பார்த்து கேலி செய்யும் காட்சி அது. அதுமில்லாமல் கதையில் வரும் பாத்திர அமைப்பு ஒவ்வொரு பாத்திரங்களையும் நம் இதயத்தில் செதுக்கி வைத்து விடுகிறது. ராக்சியின் கணவர் பாத்திர அமைப்பும்,அவருக்கான பாடலும்,கதையின் முடிவில் அவரை பற்றி ஒன்றுமே குறிப்பிடாமல் விடுவதும் nice touch. எப்பவும் பிரச்சினை செய்கிறவர்களையும்,செய்தியில் இருப்பவரையும் பற்றி தான் இந்த உலகம் (நாம்) கவலைப்படும் என்றும் விளம்பரம் தேடாமல் அமைதியாக இருப்பவரை (அவருக்கு கஷ்டம் இருந்தாலும்) உலகம் கண்டுக்கொள்ளாது என்று நமக்கு உணர்த்துவதாக இது பட்டது.

ஒரு ம்யூசிகலில் வரும் பாடல்கள் பற்றி எழுத ஆரம்பித்தால் பதிவு நீஈஈஈஈஈஈஈஈஈண்டூகொண்டே போய்விடும் என்று "Singing in the rain" பதிவு எழுதிய பின் தெரிந்துக்கொண்டேன்.பாடல்கள் பற்றி சொல்லவேண்டும் என்றால் எல்லாமே ஒரே மாதிரியான வழமையான ஜாஸ் பாடல்கள். இசை பெரிதாக நம்மை கவராவிட்டாலும் பாடல்கள் எடுத்த விதம் நிச்சயமாக நம்ம கவரும்,அதுவும் கதையின் வெளிப்பாடாக ,திரைக்கதையோடு பாடல்கல்களை கலந்திருக்கும் விதமும்் மிக அருமை.
மொத்தத்தில் ம்யூசிகல் ரசிகர்களுக்கு Chicago ஒரு சிறந்த கலை விருந்தாக அமையும் என்பது என் கருத்து

திருமணம் வாழ்க்கைக்கு அவசியமா??

இன்றைக்கு ஒரு வலைப்பதிவு நண்பரிடம் பேசிக்கொண்டிருந்த போது பேச்சு திருமணம் பற்றி திரும்பியது.
நிறம்ப பேசிய பின் எங்கள் பேச்சின் சாராம்சம் இது தான்.

திருமணம் நாமே வகுத்துக்கொண்டே ஒரு ஆடிமைத்தனம்,மனிதன் தானே வைத்துக்கொண்ட சொந்த செலவு சூன்யம். தனக்கு வேண்டிய எல்லாவற்றையும் திருமணம் என்ற சங்கிலி இல்லாமலே மனிதனால் அனுபவிக்க முடியும்.உடன் இருப்போர் நிர்பந்தத்தால் (peer pressure) மட்டுமே மனிதன் திருமணத்திற்கு ஒற்றுக்கொண்டும் பிறகு காலம் முழுதும் அதற்கு கட்டுப்பட்டும் இருக்கிறான்.

இது என் நண்பர்.

கட்டாயத்தினால் நிறைய பேர் திருமணத்துக்கு ஒற்றுக்கொண்டாலும் முக்கால்வாசிப்பேருக்கு திருமணத்தால் மகிழ்ச்சியே தான் மிஞ்சுகிறது. காதலை கொண்டாடுவதற்கும், வாழ்க்கையை துணையோடு கழிப்பதற்கும் இது அவசியம்.குழந்தை வளர்ப்பு போன்ற விஷயங்களுக்கு திருமணம் ஒரு நல்ல ஏற்பாடு.
பிரச்சினைகள் இருந்தாலும் இப்போதைய தலைமுறை அவற்றை களைந்துக்கொண்டு வருகிறது என நம்புகிறேன்

இது நான்!


நண்பர் ஒற்றுக்கொள்வதாக இல்லை.
கடைசியாக எது எப்படியோ "It works for most people" என்று சொல்லி முடித்தேன்!!
அதற்கு அவர்! "அப்படியென்று நீ நினைக்கிறாய்,ஆனால் பெரும்பாலானவர்களுக்கு இதனால் தொந்தரவு தான்,ஏதோ மாட்டிக்கொண்டு விட்டோமே என்ற கட்டாயத்தில் தான் அவர்கள் ஓட்டிக்கொண்டிருக்கிறார்கள்" என்று கூறி விட்டார்!!

அட!! என்ன இப்படி சொல்லிட்டீங்க!!!வாங்க நம்ம தமிழ் வலையுலக அன்பர்கள் கிட்டேயே கேட்டுருவோம் என்று ஒரு கருத்துக்கணிப்புக்கு ஏற்பாடு செய்ய ஆரம்பிச்சுட்டேன்!!!
கருத்து கணிப்பு எல்லாம் கேட்டா எல்லாம் பொய் தான் சொல்வாங்க!! நம்ப மக்கள் கடைந்தெடுத்த "hypocrites" என்று சொல்லி சிரித்தார்!!

எனக்கு என்ன சொல்லுறதுன்னு தெரியல!! ஆனா ஏற்பாடு பண்ணியாச்சேன்னு பதிவை போட்டுரலாம்னு எழுத ஆரம்பிச்சிட்டேன்!!! Hypocrism இல்லாம உண்மையா பதில் சொல்லங்க மக்கா!!
யார் ஓட்டு போட்டாங்கன்னு சத்தியமா தெரியப்போறதில்ல,அதனால் அவங்கவங்க தங்கமணி மற்றும் ரங்கமணிகள் பற்றி பயப்படாம தைரியமா ஓட்டு போடுங்க!!
அது சரி!! இந்த hypocrism-னா என்னன்னு கேக்கறீங்களா???
உள்ளொன்று வைத்து புறமொன்று பேசுவது!! :-)





பி.கு: "Other" ஆப்ஷனை தேர்வு செய்தால் அதன் பக்கத்தில் கொடுத்திருக்கும் field-இல் தமிழில் எழுதி வைத்தால் பார்க்க முடியவில்லை. :-( (font problem)
அன்பர்கள் ஏதாவது சொல்ல நினைத்தால் தயவு செய்து பின்னூட்டத்தில் தெரிவிக்கவும்!! :-)

படம் : http://www.serendipitycakes.co.uk/graphics/wedding-cakes3.jpg

சுதந்திர தின நல்வாழ்த்துக்கள்!! :-)

இன்றைக்கு என் நண்பர் ஒருவர் பகிர்ந்துக்கொண்ட ஒரு குறும்படத்தை உங்களிடம் காட்டலாம் என்று ஆசை!!!
அதி அற்புதமாக எடுக்கப்பட்டிருக்கும் படம். இசை,கேமரா,எடிட்டிங் என எல்லா அம்சங்களிலும் அசத்தியிருக்கிறார்கள்!!
பரத்பாலாவின் தயாரிப்பு என்றாலே இந்தியா பற்றிய அருமையான குறும்படங்கள் தயாரிப்பவர்கள் (இவர்களின் வந்தே மாதரம் குறும்படத்தை பற்றி தெரியாதவர்களே இருக்க முடியாது) என்று தெரிந்த எனக்கு இந்த படம் அவர்களின் திறமைக்கு இன்னொரு மிகச்சிறந்த உதாரணமாய் தெரிந்தது!!

மாலைப்பொழுதின் மயக்கத்திலே

இன்றைக்கு திடீரென ஏதோ எண்ணம் தோன்ற,கைப்பேசியை பொறுக்கிக்கொண்டு,பாடல் கருவியை காதில் செருகிக்கொண்டு காலார கிளம்பி விட்டேன். சிறிது தூரம் தள்ளி உள்ள ஒரு குட்டையின் பக்கத்தில் புல் தரையில் உலகை மறந்து அயர்ந்த போது அங்கு செழுமியிருந்த அழகை கண்கள் போதாதென்று கைப்பேசியிலும் தேக்கிக்கொண்டேன்.
அப்படி எடுத்த படங்களில் சிலவற்றை இதோ உங்கள் பார்வைக்கு!! :-)














பி.கு : அலைப்பேசியில் எடுத்ததால் பிக்ஸல் குவாலிட்டி அவ்வளவாக இருக்காது!! அட்ஜஸ்ட் பண்ணிக்கோங்க!! :-)

கோடை காலத்தில் ஒரு மதியம்

இன்றைக்கு ஏதோ மரம் வெட்டும்போது தெரியாத்தனமாக வயர் ஏதோ கட் ஆகி விட ,எங்கள் அலுவலகத்திலும் கரண்ட்டு கட் ஆகி விட்டது!!
சாட்டிங்,மெயிலிங் என அலுவலகத்தில் வழக்கமாக செய்யும் ஏதும் செய்ய முடியாமல் போனதால் சற்றே காலாற நடந்துவிட்டு வரலாம் என்று வெளியே கிளம்பினேன்.

கோடை கால வெப்பம் முகத்தில் அடிக்க (35-40 C) ,சிறிது நேரத்தில் திரும்பி விட்டேன்.
ஆனால் வருவதற்கு முன் அலைப்பேசியில் சில படங்களை க்ளிக்கினேன்!!
இப்பொழுதெல்லாம் ஒன்றுமே எழுத தோன்ற வில்லை ,அதான் கொஞ்சம் படம் போட்டு காலத்த ஓட்டலாமே என்று இரண்டு படங்கள் உங்கள் பார்வைக்கு!! :-)

வழக்கம் போல அலைப்பேசி புகைப்படம் என்பதால் படத்தின் தரம் (pixel quality) கொஞ்சம் கம்மி தான்!!
அட்ஜஸ்ட் பண்ணிக்கோங்க!! :-)

வரட்டா!! :-)

சொர்கத்தில் தனியாக



முதுமை



ஏக்குருவி,சிட்டுக்குருவி



குருவிக்கு தன் கூடு ,கட்டிக்கொடுத்தது யாரு??
கடுங்குளிரிலும் ,கடும் மழையிலும் காப்பாத்துவதாரு?? :-)

வெயில் ஏறிப்போச்சுன்னு ஒரு எண்ணம் வந்த போது பனிக்காலத்துல எங்க ஊருல நான் எடுத்த சில படங்கள எடுத்து பாத்துட்டு இருந்தேன்.
அதான் உங்க கிட்டேயும் காட்டலாம்னு!! :-)

டொர்னாடோவாவது ரொனால்டோவாவது!!

இன்னைக்கு ஆபீசுல வழக்கம் போல ஆணி பிடுங்கறேன் பேர்வழின்னு நம் வலையுலக நண்பர் ஒருத்தரு கூட தொலைபேசியில் மொக்கைய போட்டுகிட்டு இருந்தேன் மக்கா!!

திடீர்னு ஒலிப்பெருக்கியில ஒருத்தன் மூச்சிறைக்க கத்துறான்!! "எலே எல்லோரும் எங்கியாச்சும் ஓடுங்கலே!!! டொர்னாடோ (Tornado) வருது!!! நம்ம வானிலை ஆராய்ச்சி நிலையத்துல சொல்லீருக்காய்ங்க!!! எல்லாம் ஒழுங்க பேஸ்மெண்ட்டுகுள்ள போய் புகுந்துக்கோங்க!!! அப்புறம் ஆணி புடுங்குனவன் அத்தோட அடிச்சிகிட்டு போனான்னு நாளைக்கு நூஸ்பேப்பருல செய்தி போட்டுருவாய்ங்க!!! சொன்ன பேச்ச ஒலுங்க கேளுங்கலே" னு டென்சன் ஆயிட்டான்!!!
நான் ஒடனே தொலைபேசியுல "அண்ணாச்சி!! என்னமோ ஆயிருச்சு,உயிரோட இருந்தா நான் உங்களுக்கு அப்புறமா போன் பண்ணுறேன்" அப்படின்னு காலை கட் பண்ணிட்டேன் (அவர் காலை இல்லைய்யா!! போன் கால!! ஆசை!! :-P)

போன வெச்சுட்டு சுட்டும் முட்டும் பாக்குறேன். நம்ம தேசி மக்கள் (அதாங்க,நம்ம இந்தியர்கள்) எல்லாம் திரு திருன்னு முழிச்சிகிட்டு இருக்காய்ங்க!! நான் ஒடனே ஒருத்தன் கிட்ட போய்ட்டு
"அண்ணே!! இப்ப என்ன ஆச்சுன்னு எல்லோரும் டென்சன் ஆகுறாய்ங்க அண்ணே" அப்படின்னு அப்பாவியா (?!) கேட்டேன்!!

அவரு ரெண்டு பக்கமும் பாத்துட்டு!!
"எலே வெளயாடுற வேளையால்லே இது???? புயல் வருதாம்லே!!அதுவும் சாதாரண் புயல் இல்ல,சூறாவளி புயலு. "Twister" படம் பாத்திருக்கியா?? அதுல வரும்ல!! அதான்"

"ஆகா!!! அப்போ நம்ம பார்க்கிங்கு எடத்துல இருக்கற காரு எல்லாம் அந்த படத்துல வரா மாதிரி பறக்குமா?? புயல்ல எறுமை மாடு எல்லாம் அடிச்சிட்டு வந்து சுத்தி சுத்தி பறக்குமா??" அப்படின்னு கண்கள் விரிய கேட்டேன்.

"எலே நெக்கலா??? விட்டா உன்னையே அடிச்சிட்டு போயிரும் தெரியும்லே" அப்படின்னு அண்ணாச்சியும் பீதியை கிளப்ப முயற்சி பண்ணிட்டு இருந்தாரு.

"அட சும்மா இருங்க அண்ணாச்சி,நான் இது வரைக்கும் ஒரு டொர்னாடோ கூட நேருல பாத்ததே கிடையாது.இன்னைக்காவது பாக்கலாம்னு பார்த்தேன்,விட மாட்டீங்க போல இருக்கே" என்று வருத்தப்பட்டேன்.

"ஏண்டா டேய்!!! இதென்ன ஷகீலா படமா??? கும்பலா உக்காந்து பாக்குறதுக்கு!!!!புயல் டா புயல்!! அது அடிச்சா ஒரு பயல் மிஞ்ச மாட்டான் தெரியுதா???" அப்படின்னு ஏறுராரு!!

"நீங்க என்ன வேணும்னாலும் சொல்லுங்க அண்ணாச்சி!! இன்னைக்கு டொர்னாடோ பாத்துட்டு தான் மறு வேலை(?!)" அப்படின்னு சொல்லிட்டு விரு விருன்னு வெளியே கிளம்பிட்டேன்.

நான் போறத பாத்துட்டு மற்ற நம்ம ஊரு பசங்க சில பேரு நம்ம கூடவே வந்துட்டாய்ங்க!! எவனாவது ஏதாவது செஞ்சா யோசிக்காம பின்னாடி வரது தமிழனுக்கு புதுசா என்ன???

வெளியில வந்துட்டு பாத்தா ஒரே மேகமும் காத்துமா இருக்கு!! கொஞ்ச நேரம் கழிச்சு டொர்னாடோ பாக்குற ஆசையில் அண்ணாச்சியும் குடு குடுன்னு ஓடி வந்துட்டாரு!! எல்லோரும் காத்துல நிந்துக்கிட்டு ஒரு 15-20 நிமிஷம் சுத்தி சுத்தி பாத்தோம்!!!! டொர்னாடோவும் வரல்ல,ரொனால்டோவும் வரல்ல!!! :-(
இருந்தாலும் வெளியில போன தோஷத்துக்கு கைப்பேசியில் ஒரு 3-4 படங்களை சுட்டு தள்ளினேன்!!!அதை என் வலையுலக நண்பர்களாகிய உங்களிடம் பகிர்ந்துக்கொள்ளலாம் என்று தோன்றியது!!
அதுக்கு தான் இவ்ளோ பில்ட் அப்பு!! :-D

படங்கள் எல்லாம் அலைப்பேசியில் எடுத்ததால் அவ்வளவாக குவாலிடி நல்லா இருக்காது (pixel wise),அதனால கண்டுக்காதீங்க!! :-)



ஆங்கிளு பாத்தீய்ங்கல்ல!!!! B-)

கொஞ்சம் திரும்பினா

இன்னும் கொஞ்சம் திரும்பினா


அட்ரா அட்ரா இதுக்கு பேருதான் ஒளி வட்டம்னு சொல்றாய்ங்களா??



என்ன வேணுமினாலும் சொல்லுங்க மக்கா. கறுப்பு வெள்ள படம்னாலே ஒரு தனி கலை தான்!! மொத படத்தையே கறுப்பு வெள்ளையா மாத்துனா எப்படி தூள் கெளப்புது பாத்தீகளா???

என்ன???
ஓவரு மொக்கையாயிருச்சா??
கோபம் கோபமா வருதா???? பின்னூட்ட பொட்டி தொறந்துதான் கெடக்கு!!
இதுக்கு மேல நான் ஒன்னும் சொல்லல!!

வரட்டா?? :-)

Related Posts Widget for Blogs by LinkWithin